Bütün görüşlərimdə və şer məclislərində təxəllüsümün nə üçün "Dilənçi" olduğunu soruşurlar.
Şerimdə görəndə təxəllüsümü,
Sanmayın var-dövlət dilənçisiyəm.
Bütün var-dövlətim ürəyimdədir,
Bir zərrə məhəbbət dilənçisiyəm.
Gələcək bağında gül əkmişəm mən,
Ən yaxşı günlərdən əl çəkmişəm mən,
Qeyrətli ellərə göz tikmişəm mən,
Xalqıma şan-şöhrət dilənçisiyəm.
Azadlıq yoluna, yolum deyirəm,
Dilimə mən qurban olum deyirəm,
Vətən düşməninə: -ölüm deyirəm!
Yurduma səadət dilənçisiyəm.
Qaranlıq gecəyə ay vermək üçün,
Ellərə xoşbəxtlik pay vermək üçün,
Məzlum insanlara hay vermək üçün,
Cəsarət, dəyanət dilənçisiyəm.
![](bottombarraback.jpg"){kind=small}
